عبء اللورد بيروس

عبء اللورد بيروس 

إهداء : إلى المبدع الياباني العظيم "أكيرا تورياما" الذي سمح لي باستعارة اللورد "بيروس" في هذه القصة .. ومن لا يصدقني فليسافر إلى اليابان ويسأله .. 

*** 

"لورد بيروس .. استيقظ .. لقد انتهت الغفوة .. تركتك أربعة أعوام .. ياللكسل !" 

تثاءب اللورد بيروس وفتح عينيه .. وتمطع بقوة .. لتنطلق طاقة من يديه محطمة أحد الأقمار المحيطة بكوكبه ! 

"لم تعد الغفوة تكفيني يا ويس .. لم لا تتركني نائمًا ؟" 

خبط "ويس" بيده على جبهته بغيظ : 

"نمت أربعًا وثلاثين عامًا كاملة هذه المرة .. لم أصاحب حاكم دمار بهذا الكسل من قبل " 

بيروس :"حسنًا .. حسنًا .. ها أنا قد استيقظت .. أهناك ما يؤكل ؟" 

ويس :"لازال لدينا وجبات من كوكب سادالا" 

بيروس : "اللعنة .. طعامهم هو الأسوأ في الكون !" 

ويس : "لقد دمرت كوكبهم على أية حال .. لن يطبخوا ثانية " 

*** 

جلس اللورد بيروس على المائدة مع رفيقه ومساعده "ويس" .. وسأله وهو لا يزال يغالب آثار النوم : 

-"ما جدول أعمالنا يا ويس ؟ كم كوكبًا سندمر هذه المرة ؟" 

ويس : "ليس الكثير .. حاكم البناء بالكون لم يستطع تعمير عدد كبير من الكواكب هذه المرة .. وكما تعلم مهمتنا هي حفظ التوازن بالكون .. هذه هي مهمة حكام البناء والدمار " 

بيروس : "ذلك الكسول اللعين !" 

ويس : "على أية حال مهمتك لن تكون تدمير كوكب كامل كالعادة ..هناك كوكب يمكن أن يكون مفيدًا .. لكن طاقة مظلمة غريبة تخرج منه .. وتسمم الفضاء بالكامل .. ستدمر فقط مصادر هذه الطاقة " 

بيروس : "بيروس حاكم الدمار ..يهدر طاقته في تدمير أجزاء من كوكب ! ياللغباء !" 

ويس :" لعلك تود أن تقول رأيك للورد "زينو" بنفسك .. وأنا واثق أنه سيهتم جدًا حين تصف أوامره بالغباء !" 

أصيب اللورد "بيروس" بالهلع .. وقفز من مقعده صارخًا : 

-"أيها الأحمق لماذا لم تقل أنها أوامر اللورد زينو بنفسه ؟ لنتحرك حالًا !" 

ويس : "الطريق طويل إلى هناك .. سنستغرق أربعين دقيقة" 

بيروس :"أربعون دقيقة كاملة ! أهو بهذا البعد؟" 

ويس : "لنتحرك وسأخبرك بالتفاصيل في طريقنا" 

*** 

مشهد مهيب هو .. ويس ممسكًا بعصاته ذات الكرة الزجاجية .. ومن حوله مكعب شفاف يجلس بيروس على أرضيته .. ويطيران بسرعة رهيبة في الفضاء الشاسع .. 

يراهما سكان الكواكب .. ويظنونه شهابًا منطلقًا بلا هدف .. غير عالمين أن هذا الشهاب هو أقوى وأخطر شخصين في الكون بأسره ! 

-"ما مصدرالطاقة المظلمة يا ويس ؟ هل هو فريزا ؟ هل عاد هذا الوغد إلى عادة السيطرة على الكواكب ؟" 

ويس : "لقد مات فريزا منذ أعوام .. هناك مقاتل من كوكب فيجيتا استطاع القضاء عليه !" 

بيروس :"فريزا قد انهزم ! ياللمفاجأة !" 

ويس :"مصدر هذه الطاقة هو مجموعة من سكان الكوكب .. لعلهم أصلًا لا يعرفون أنهم مصدرها .. سأخبرك بالضبط كيف تعرف إذا قابلت أحدهم .." 

بيروس : "ما اسم هذا الكوكب يا ويس ؟ لقد أثرت فضولي حقًا .. إنه أول كوكب لا يأمر اللورد زينو بتدميره بالكامل " 

ويس : "اسمه كوكب الأرض" 

بيروس :"الأرض ؟ همممم .. لنرى !" 

*** 

في الأرض دار نقاش ساخن بين اثنين في إحدى البقاع التي تطل على ناصية مميزة بين البحر المتوسط والبحر الأحمر و ... ما هذا ؟ إنها مصر يا أخي .. لقد عدنا بسرعة ! 

حسن : "أنا تعبان أوي يا سعيد .. امبارح رحت لدكتور نفسي وطلع عندي اكتئاب .. أنا فعلًا حاسس إني مظبوط من ساعة ما علا سابتني .. ومن بعد الحادثة اللي كنت هموت فيها .. ده غير الأزمة المالية .. مش عارف أعمل إيه !" 

وضع "سعيد" ساقًا على الأخرى .. وسحب نفسًا من السيجارة .. وضيق عينيه بخطورة وقال : 

سعيد : "يا حسن مش انت لوحدك اللي تعبان .. كلنا تعبانين .. استرجل كدة وبلاش مياصة .. كل اللي حصل لك ده بيحصل لغيرك على فكرة وبيكملوا حياتهم زي الفل .. مفيش حاجة اسمها اكتئاب أصلًا .. انت بس بعيد عن ربنا .. صلي واقرا قرآن هتبقى زي الفل !" 

حسن "باستنكار" :"إيه العلاقة يا سعيد ؟ الاكتئاب ده مرض ! أنا مبنامش غير 3 ساعات كل يوم !" 

سعيد : "أنا بقى امبارح نايم ساعتين بس .." 

حسن : "حاولت أنتحر مرتين والناس لحقتني !" 

سعيد : "أنا بقى عمتي لسة ميتة امبارح .. و زي الفل أهو" 

حسن : "يا سعيد هي مسابقة ! بقولك مريض اكتئـ..." 

قاطع حديثهما ظهور اللورد بيروس من العدم فجأة .. 

مهيب طويل .. يشبه الكائنات الفضائية .. 

سعيد : "قط سعران ده ولا إيه؟" 

فجأة وجد اللورد بيروس على بعد أقل من متر منه .. لم يره وهو يتحرك أصلًا ! 

رفع بيروس كفه المفتوحة في وجه سعيد .. وقال ببرود : 

-"هاكاي !" 

وهنا خرجت طاقة أرجوانية اللون من يده .. أحاطت بسعيد في جزء من الثانية .. ودوت صرخة سعيد المرعبة ! 

وسريعًا تفتت جسد سعيد .. واختفى تمامًا ! 

حسن "مرتجفًا" : انت عملت فيه إيه ؟ 

بيروس : "صديقك أحد مصادر الطاقة المظلمة التي تسمم الكون .. لهذا دمرته ومحوته تمامًا" 

واختفى فجأة كما جاء .. 

*** 

في بقعة أخرى كان "حازم" يصرخ في وجه رفاقه .. 

حازم : "الشيخ عبد العزيز شكري ده راجل فاهم في الدين .. بتكرهوه ليه ؟ طب هو مرجعيته الدين ورأيه هو رأي الدين .. انتوا مرجعيتكم إيه ؟" 

-"يا حازم مفيش حاجة اسمها رأي الدين .. الدين فيه نصوص اختلفوا في تفسيرها .. عشان كدة في أربع مذاهب .. رأي الدين مش واضح وصريح في حاجات .. ومن حق كل واحد إنه يفكر ويستفتي قلبه .. وعبد العزيز ده بيسيء للدين .. وطريقته هجومية وعنيفة ! وبيشتم اللي بيعارضه .. هو ده الدين !" 

حازم "صارخًا" : أي حد بيكره الشيخ عبد العزيز يبقى أكيد ملحد وكافر .. وأكيد الشيخ قصف جبهته قبل كدة .. الشيخ عبد العزيز كلامه هو الدين بحذافيره و .." 

ظهر بيروس فجأة .. ورفع يده في وجه "حازم" .. عمت حالة من الصمت والصدمة و .. 

-"هاكاي !" 

دوت صرخة حازم وهو يتلاشى من الوجود .. 

*** 

في مكان آخر .. 

مدحت : "إزاي يعني مايكتبش عالفيس ويشارك معانا في الحملة والهاشتاج ؟ ده خاين وكلب وجبان !" 

عصام :"يا مدحت هو حر ! كل واحد حر يكتب اللي هو عايزه أو مايكتبوش .. مش من حقك تعترض ولا تشتمه .. ما يمكن ملوش في السياسة يا أخي !" 

مدحت : "إزاي يعني ؟ لا طبعًا .. احنا بقى هنعمل حملة ضده عشان يكتب اللي احنا عايزينه بالظبط .. وهو شخصية عامة .. يعني عادي من حقي أشتمه زي منا عايز و ..." 

بيروس : "هاكاي" 

صرخة مدحت .. انتهى كل شيء .. 

*** 

الحاج جمال : "لا طبعًا أنا بنتي مستحيل تتجوز في الشقة دي ! دي أوضتين وصالة ! هتحط أوضة الأطفال فين ؟" 

أحمد : "يا عمي أنا لسة في بداية حياتي .. وكافحت كتير عشان أجيب الشقة دي ! وبعدين أوضة الأطفال دي مش هنستخدمها غير لما نخلف ويوصل سنه 5 سنين عالأقل ! هنجيبها من دلوقتي ليه !" 

الحاج جمال : "أومال أنا لما أجيلكم هبات فين ؟" 

أحمد : "نعم !" 

بيروس :"هاكاي" 

انتهى الحاج جمال .. 

*** 

ولاء : "يا سمير أنا مابقيتش حاسة معاك بالأمان .. الموضوع مش فلوس خالص .. بس أنا محتاجة أحس بالأمان .. صحيح أنا سبتك عشان أتخطب لحسين .. وصحيح هو مليونير .. بس مش معنى كدة إني بفكر في الفلوس خالص .. أنا عايزة بس أحس بالأمـ.. !" 

بيروس :"هاكاي" 

*** 

هاكاي .. 

هاكاي .. 

هاكاي .. 

*** 

بعد أيام طويلة والكثير من الـ"هاكاي" .. والعودة إلى كوكبهم البعيد .. سأل اللورد بيروس : 

- "قل لي يا ويس .. في رحلتنا للأرض رأيت حروبًا وفسادًا بلا حدود .. أيعقل أن كل هذا لا يخرج طاقة مظلمة كهؤلاء التافهين الذين دمرتهم ؟" 

ويس : "الحروب ستكون دائمًا موجودة .. لو دمرت كل من تسببوا فيها سيظهر غيرهم حتمًا .. هؤلاء هم البشر .. لو جعلتهم جميعًا بنفس اللون .. ستندلع الحروب بين ذوي الشعر الأشقر والأسود ! 

لو جعلتهم جميعًا دولة واحدة .. سيتنازعون على الحكم حتى الموت ! الفساد والحروب مستمران إلى الأبد .. لو انقرض جنس كامل وبقي منه شخصان فقط .. سيتنازعان حتى الموت على قطعة لحم ! 

لقد تعلم الكون منذ زمن أن يتوازن .. الحرب والسلام .. النزاهة والفساد .. الخير والشر .. سيظل هذا الصراع الأزلي قائمًا .. 

لكن من دمرتهم على الأرض .. هم نوع جديد .. طاقة سلبية غريبة .. عجز الكون عن التعامل معها .. وكان لا بد من تدخل اللورد بيروس .. حاكم الدمار .. ليعيد التوازن إلى الكون !" 

بيروس : "لن أفهم تفكير الفانين أبدًا .. يتقاتلون لطموحات ومطامع تافهة !! لكن الأحمق حاكم البناء سيعمر كواكبًا أخرى .. وسيظهر أمثالهم حتمًا على أية حال " 

ويس "ضاحكًا" : وما مغزى وجودنا إذن ؟ البناء والدمار .. تحقيق التوازن في الكون .. هذه هي القصة يا لورد بيروس !" 

تمطع بيروس بقوة محطماً قمرًا آخر فوق كوكبه .. 

بيروس : "تعبت كثيرًا هذه المرة .. لعل الطاقة المظلمة أثرت في صحتي .. سأعود للنوم .. أيقظني بعد ثلاثين عامًا بالضبط .. لن أكون كسولًا هذه المرة !" 

ويس "هامسًا بخبث" : "نعم بالتأكيد .. نفس ما قلته في المرة الماضية !"